خواجہ غلام فرید رحمۃ اللہ علی
میڈا عشق وی توں، میڈا یار وی توں
میڈا دین وی توں ایمان وی توں
میڈا جسم وی توں، میڈا روح وی توں
میڈا قلب وی توں، جند جان وی توں
میڈا قبلہ کعبہ مسجد مندر
مصحف تے قرآن وی توں
میڈا ذکر وی توں ،میڈا فکر وی توں
میڈا ذوق وی توں، وجدان وی توں
میڈا دھرم وی توں، میڈا بھرم وی توں
میڈا شرم وی توں ، میڈا شان وی توں
میڈا دکھھ سکھھ رو ون کھلن وی توں
میڈا درد وی توں درمان وی توں
میڈا حسن تے بھاگ سُہاگ وی توں
میڈا بخت تے نام نشان وی توں
میڈی مہندی کجّل مساگ وی توں
میڈی سُرخی، بیڑا ، پان وی توں
میڈی وحشت جوش جنون وی توں
میڈا گریہ آہ و فغان وی توں
میڈا شعر عروض قوافی توں
میڈا بحر وی توں اوزان وی توں
میڈا اول آخر اندر باہر
ظاہر تے پنہان وی توں
جے یار فرید قبول کرے
سرکار وی توں سلطان وی توں