بڑے خلوص سے دل نذرِ جام کرتا ہے

جو حادثے یہ جہاں میرے نام کرتا ہے

بڑے خلوص سے دل نذرِ جام کرتا ہے

ہمِیں سے قوسِ قزح کو مِلی ہے رنگینی

ہمارے در پہ زمانہ قیام کرتا ہے

ہمارے چاکِ گریباں سے کھیلنے والو

ہمیں بہار کا سورج سلام کرتا ہے

یہ میکدہ ہے یہاں کی ہر ایک شے کا حضور

غمِ حیات بہت احترام کرتا ہے

فقیہہِ شہر نے تُہمت لگائی ساغرؔ پر

یہ شخص درد کی دولت کو عام کرتا ہے

ساغرؔ صدیقی

ـــــــــــــــــــــــــــــــــــــــــــــ

مرے چمن کو جہاں میں یہ سرفرازی ہے

مرے چمن کو جہاں میں یہ سرفرازی ہے

ہر ایک پھول نئی زندگی کا غازی ہے

بہار میں بھی سُلگتے رہے ہیں کاشانے

کہ یہ بھی ایک طرح کی ستم طرازی ہے

میں اس مقام پر تجھ کو تلاش کرتا ہوں

حقیقتوں کا تصرف جہاں مجازی ہے

خُدا کے نام پہ پہلا سُبو اُٹھاتے ہیں

کہ مے کشوں میں یہی رسمِ پاکبازی ہے

تمہاری زلفِ پریشاں کودام کہ دینا

بڑا حَسین طریقِ فغان نوازی ہے

رَوش رَوش پر ہیں برق و شرر کے ہنگامے

مجھے یقیں ہے بہاروں کی کار سازی ہے

لِکھو!یہ عِظمتِ ہستی کے باب میں ساغرؔ

کہ غزنوی کی جلالت غمِ ایازی ہے

(ساغرؔ صدیقی)

آج روٹھے ہوئے ساجن کو بہت یاد کیا

آج روٹھے ہوئے ساجن کو بہت یاد کیا

اپنے اجڑے ہوئے گلشن کو بہت یاد کیا

جب کبھی گردش تقدیر نے گھیرا ہے مجھے

گیسوئے یار کی الجھن کو بہت یاد کیا

شمع کی جوت پہ جلتے ہوئے پروانے نے

اک ترے شعلہء دامن کو بہت یاد کیا

جس کے ماتھے پہ نئی صبج کا جھومر ہوگا

ہم نے اس وقت کی دولھن کو بہت یاد کیا

آج ٹوٹے ہوئے سپنوں کی بہت یاد آئی

آج بیتے ہوئے ساون کو بہت یاد کیا

ہم سر طور بھی مایوس تجلّی ہی رہے

اس در یار کی چلمن کو بہت یاد کیا

مطمئن ہو ہی گئے دام قفس میں ساغؔر

ہم اسیروں نے نشیمن کو بہت یاد کیا؎

ــــــــــــــــــــــــــــــــــــــــــــــــــــــــــــــــــــــــ

(ساغؔر صدیقی)

چراغ طور جلاؤ! بڑا اندھیرا

چراغ طور جلاؤ! بڑا اندھیرا

ذرا نقاب اٹھاؤ! بڑا اندھیرا ہے

ابھی تو صبح کے ماتھے کا رنگ کالا ہے

ابھی فریب نہ کھاؤ! بڑا اندھیرا ہے

وہ جن کے ہوتے ہیں خورشید آستینوں میں

انہیں کہیں سے بلاؤ! بڑا اندھیرا ہے

مجھے تمھاری نگاہوں پہ اعتماد نہیں

مرے قریب نہ آؤ! بڑا اندھیرا ہے

فراز عرش سے ٹوٹا ہوا کوئی تارہ

کہیں سے ڈھونڈ کے لاؤ! بڑا اندھیرا ہے

بصیرتوں پہ اجالوں کا خوف طاری ہے

مجھے یقین دلاؤ ! بڑا اندھیرا ہے

جسے زبان خرد میں شراب کہتے ہیں

وہ روشنی سی پلاؤ! بڑا اندھیرا ہے

بنام زہرہ جبینانِ خطّہء فردوس

کسی کرن کو جگاؤ! بڑا اندھیرا ہے

(ساغر صدیقی)